Алтан намарнай бүхы шадалаараа хүсэндөө ороо ха юм даа гэжэ театрайнгаа арын хорёо соо алтан шара набшаһадай унахые хаража һуутарни (зохидхон һандалинууд, зунай модон буряад гэршье бии юм тэндэмнай), Чимит артист хүбүүмнай гартаа аягатай һү бариһан, нам тээшээ алхалжа ерэбэ. Заа, энэ хүмнай бурхад сахюусадтаа һүн дээжэеэ үргэжэ, сэдьхэл һанаагаа тэгшэлхэнь гэжэ бодоод, һаалта хэхэгүй гэжэ аалин һуубаб. Эгээл түрүүшын, Зүжэгшэн хүнэй, концерт тоглолто эхилхээ байна, хамаг юумэн бэлэн… гансал досоонь нэгэ бага хүлгөөтэй, элил даа энэнь. Теэд, шэг шарайгаараа доторойнгоо байдал харуулхагүй гэжэ оролдоно, гэбэшье суг хүдэлжэ ябаһан бидэ ойлгонгүй яахабибди. Гансаараа харагшадтаа зүжэг, концерт тоглохо гээшэ тиимэшье бэлэн хэрэг бэшэл даа. Үльдэргэ тоонто нютагһаа аха дүүнэр, хани нүхэд гээд лэ нютагай зон булта олоороо суглархаа байна…

Театраймнай ордон соо шууяатай, олон зон сугларжа тоглолтын эхилхые хүлеэжэ ядан һуунад. Тиигээд лэ эбтэйхэнээр альгаа ташажа Чимидээ угтан абабад, зохидхон хөөрөөгөөрөө, мүнөөнэйхеэр хэлэхэ болоо һаа, стендап шогтой үгэнүүдээр, ородооршье, буряадааршье, хүнгэнөөр концерт тоглолтоо эхилбэ. Зүжэгшэн хүнэй тайзан дээрэһээ, эгээл дүтын хүнтэй хөөрэлдэһэн маягтай концерт, манай харагшадта ехэ тааруу, зүрхэ сэдьхэлдэ зохид гэжэ бодогдодог. Хажуугаарнь манай театрай хүгжэмэй таһагые даагша Анастасия Дружинина түшэг тулгууринь – Чимидэй  «подруга» боложо, пианино дээрээ аялга гаргахын хажуугаар, ородоор буруушагаар хэлэһэн үгэнүүдыень эрхэлүүлэн һагад, заһан үгэжэ байба. Чимитнай хара багаһаа, артистын харгыда гаратараа ушарһан элдэб һонин ушар ябадалнуудаа хөөрэжэ үгэбэ. Аялгата дуунуудые субад эрдэни мэтээр, хөөрөөнэйнгөө дундуур шэмэглэн оруулжа, харагшадайнгаа зүрхэ сэдьхэлээр гартаа жэжэ бүмбэгөөр наадажа байһан мэтэ үзэгдэнэ. Теэд харагшаднайшье Чимидэй мэдэлдэ зүрхөө өөрын дураар үгөө бшуу. Абын одхон хүбүүн эсэгын шангахан һургаал шагнажа, өөрынь хэлээшээр, «воспитанный в лучших традициях бурятской педагогики» мүнөөдэрэй Чимит иимэл болоод байха ёһотой гэжэ бодожо һуунаб. Теарта арба гаран жэл соо алба хэжэ, болбосоржо, эды шэнээн болоһон Чимидэй туйлаһан үрэ дүнгыень мүнөө энэ хаража байна гээшэлди даа. Энэ юртэмсын уларил шэнги, сагайнгаа ерэхэдэ намар, хабар, нажар, үбэлшье шэнги бүхы шадалаараа хүсэндөө орожо, урагшаа дабшажа, энээн дээрээ тогтонгүй дуугаа хангюурдан, зүжэг концертнуудаа тогложол ябыш даа! Залуу артистнарнай хаража, саашадаа жэшээ болгожо абаха байха гэһэн бодол досоом түрөө бэлэй.

20.10.2024он.           Жажан Динганорбоева, Буряад Уласай Арадай зүжэгшэн.