«ҺЭРЮУХЭН НАМАРНАЙ» ҺЭБШЭЭГЭЭР ЭЛЬБЭЭД, ЭЭЛЖЭЭНДЭЭ ЭРЬЕЭД…
«Һэрюухэн намарнай» гэһэн жэл бүхэндэ энээхэн үе багаар эмхидхэгдэжэ байдаг ээлжээтэ тоглолтомнай Буряад драмын академическэ театрай тайзан дээрэ ноябриин 7-до үнгэрбэ.
Заншалта болоһон тоглолтоёо удаан хүлеэһэн харагшаднай түрэл театртаа олоороо суглараа. Иимэ мартагдашагүй, ялас гэмэ уулзалганууд буряад хүнэй зүрхэ сэдьхэлые уяруулан, баяр бахархалаар халяан, энэ намарай һэрюухэн хаһада дулааханаар эльбэн байгаа гэбэл алдуугүй.
Угсаата арадаймнай баялиг болохо – хэдэн ондоо угуудай үндэһэн хубсаһаа шэмэг болгон үмдэһэн һаруул шарайтай зүжэгшэд аргалхын шэдитэй хэнгэрэгүүдэй абяан доро, алда хадагаар харагшадаа золгон, хүшэгэеэ нээгээ.
Дура татаһан зүжэгшэдтэйгөө уулзажа байһан харагшаднай сэдьхэл шэшэрүүлмэ түрэл һайхан аялгануудаа шагнаха, шэхэнэй шэмэг, сэдьхэлэй баяр болодог уянгата сэбэр хүгжэмөө соносохо, бэедээ шэнгээхэ гэжэ тудаһан талаандаа баяртайнууд байгаа бэзэ. Театраймнай зэндэмэни, гоёолто, шэмэгынь гүүлэжэ ябадаг хэдэн үе зүжэгшэд бэлигэйнгээ унтаршагүй элшэ хүсые танхим дүүрэн һууһан айлшадтаа дууһан бэлэглээ.
Энеэдэ, наада зугаада дуратай буряад харагшадай һонорто эгээл һонирхол татама зүжэгүүдһээ шогтойхон хэһэгүүд дурадхагдаа. Мүнөө үеын элдэб ябадалнуудые шүүмжэлһэн, шоглоһон эдээхэн хэһэгүүд харагшадай үргэ аманай хуян тараажа, сэдьхэлыень хүхеэжэ, одоол һайшаагдаа, һайхашаагдаа гээшэл даа.
Түрэл хэлэнэймнай баялигай дээжэ уянгата шүлэгүүдшье уран һайханаар уншагдаа. Оршон үеын хүгжэм доро хатарнуудшье гүйсэдхэгдөө.
Түхэреэн шаргал нарамнай
Түби дэлхэйгээ тойрожол байг!
Түрэл буряад урлалнай
Түүхэдэ мүнхэ дэлгэржэл байг!
Бадарһан зулын гэрэл мэтэ,
Бадма сэсэгэй баглаа шэнги,
Буряад арадайнгаа заншал барин,
Бултадаа амжалта түгэс ябыт!
Хүндэтэ харагшаднай, ноябриин 24-нэй үдэшын 5 сагта энэ тоглолтоёо дахяад дабтахабди. «Һэрюухэн намарайнгаа» хүхюу нааданда, хүгжэм дуундаа уринабди!
Последние новости
-
Художественный руководитель Буряад театра Олег Юмов и актриса театра Номин Цыренжапова побывали в 33 гимназии и встретились с учениками 8 класса.
18 Апреля -
Впервые в Бурятии прошли спектакли с тифлокомментированием
15 Апреля -
Репертуар Буряад театра на май 2024
11 Апреля -
О спектакле «Дон Жуан»
11 Апреля -
Бурятский академический театр драмы имени Хоца Намсараева учредил специальную премию от театра
11 Апреля -
Бурятский академический театр драмы имени Хоца Намсараева учредил специальную премию от театра
11 Апреля