Министерство культуры Республики Бурятия
БУ СБДЭЗ «БУРЯАДАЙ ГҮРЭНЭЙ Х. НАМСАРАЕВАЙ НЭРЭМЖЭТЭ АКАДЕМИЧЕСКЭ ДРАМЫН ТЕАТР»
Режим работы кассы
с 10:00 до 18:30,
перерыв с 14:30 до 15:00,
без выходных
8 (3012) 222-537
Республика Бурятия
г.Улан-Удэ, ул.Куйбышева, 38
23
мая
Агын чемодан
Майн 18-19-дэ Агын соелой байшан соо соелой зүжэг нааданай еһотой һайндэр үнгэрбэ
 
“Хуби заяанай чемодан” гэһэн комеди (авторнуудынь - Леонид ба Ирина Ворон, оршуулгань -Дабацу Юндунова) Хоца Намсараевай нэрэмжэтэ Буряадай академическэ театрай уран һайханай хүтэлбэрилэгшэ Саян Жамбалов найруулан табижа, буряад арадай хэдэн үе зоной еһотой кумирнууд болоһон артистнууд, Ородой холбоото Уладай Арадай артистнар  Марта Зоригтуева, Людмила Дугарова, Ородой холбоото Уладай соелой габьяата  артистнар Дарима Сангажапова, Чингис Гуруев, Олег Бабуев, Должин Тангатова, Буряад Уладай Арадай артист  Зоригто Ринчинов гэгшэд уран һайхан талаан бэлигээрээ дахяад харагшадаа баясуулба.
 
Табяад жэлэй туршада тайзан дээрэ ялас гэмэ дүрэнүүдые харуулжа, олон тоото рольнуудые наадаһан, олон үе харагшадтаа танил, дүтэ болоһон эдэ артистнарай наада хаража, сэдьхэл зүрхэеэ хүдэлгэн, урмашан баясахаар байба. Нюдэндөө галтайхан, согтой дорюун зандаа ябаһан эдэ артистнар “комеди” гэһэн жанр соо шадамар бэрхээр ажаһуужа, харагшадта үнэншэмэ зураглал, ажабайдалай һабагшатай зүжэг харуулаа. 
 
Үтэлхэ наһан хэндэшье хүрэхэ, гансаардахашье саг ерэжэ болохо, зүгөөр, инаг дуран, жаргалай найдал гээшэ ямаршье наһанда адли шухала  мэдэрэл, гэһэн бодол зүжэг харагшадта артистнар эли бодо харуулжа шадаа. 
 
Буряадай театрай артистнуудта, энэ ажал ябуулжа байгаа мэргэжэлтэдтэ: гастроль эмхидхэгшэдтэ, жолоошон, сценын ажалшадта, буряад арадай театрай домог болоһон эдэ аха нүхэдтөө - баяр баясхалан хүргэжэ, зүжэгэй түгэсхэлдэ халуун альга ташалган удаахан саг соо замхаагүй. 
 
Олон тоото залуу һүрэгөө дахуулан ябаһан эдэ аха захатандаа наһанай утые, замай һайханиие хүсөөд, зүжэг наадамнай һалбаржа, буряад хэлэн дээрэ табигдаһан ялас гэмэ найруулгануудтнай арад зоноо баясуулан байг лэ, гэжэ үреэнэбди!
 
Долгорма Долгоржапова, Үбэр Байгалай хизаараар буряад соел хүгжөөлгын түбэй методист, Ага тойрог дотор театрай һалбари хүтэлэгшэ. 

Фотоотчет