Эдэ үдэрнүүдтэ Хоца Намсараевай нэрэмжэтэ Буряадай гүрэнэй Ажалай Улаан тугай орденто академическэ драмын театр 85 жэлэй ойн баяр үргэнөөр тэмдэглэгдэнэ.

Эмхидхэгдэһэн хэмжээ ябуулгануудай үедэ амаршалгануудые, баярай бэшэгүүдые абажа байһан буряад театрайхид гэртэхинэй харууһагүй үлэһэн үхибүүдтэ туһа хүргэдэг Хяагтын түбэй хүмүүжэмэл Эмма Тазетдиновае урижа, театрай ажабайдалтай танилсуулаа. Эмма буряад драмын театрай ажабайдалтай танилсажа, зүжэгшэдөөр уулзаба. Тиихэдээ театрай бүхы хүдэлмэришэдэй ажалтайнь танилсажа, абяа буулгадаг студи басаганай һонирхол татаһан байна.

- Манай театрай хүндэтэ айлшан Эмма Тазетдинова. Энэ уулзалга зүрхөө доһолгон хүлеэгээбди, - гэжэ Буряад Уласай габьяата зүжэгшэн Надежда Мунконова олон харагшадай сэдьхэлэй хүбшэргэй дайраһан “Аба, эжын ургынууд” гэһэн зүжэгэй удаа Эмма Тазетдиновае тайзан дээрэ уриба.

Байгша ондо Эмма амжалтатайгаар 9-дэхи класс дүүргэбэ. Тэрэ шүлэг зохёохо, дуу дуулаха бэлиг талаантай юм. Эдир басаган багаһаа хойшо зүжэгшэн болохо хүсэлтэй. Тайзан дээрэ гаража, эрхим зүжэгшэдтэй уулзаха хүсэлынь мэдэжэ, Буряад драмын театр Эмма Тазетдиновае уриһан байна. Тэрэ зүжэгшэдтэ сэсэгүүдые бэлэглэжэ, дурасхаалай гэрэл зурагуудые буулгаба.

Буряад Уласай Болбосоролой болон эрдэм ухаанай яаманай дэмжэлгээр, Үхибүүдэй эрхын талаар этигэмжэтэ түлөөлэгшын үүсхэлээр “Созвездие улыбок” гэһэн түсэлэй программаар энэ уулзалга эмхидхэгдэбэ. Үнгэрһэн жэлдэ эрэмдэг бэетэй 10 үхибүүд мэдээжэ тамиршад, зүжэгшэд, сурбалжалагшадтай уулзаһан юм гэжэ һануулнабди.

Айгиз Баймухаметовэй зүжэгөөр найруулан табиһан “Аба, эжын ургынууд” гэһэн зүжэгтэ хүүгэдэй гэртэ хүмүүжэдэг үхибүүдэй хуби заяан тухай харуулагдана. Буряад театрай тайзан дээрэ табигдаһан энэ зүжэг мүнөө сагай эрхэ байдалда шухала асуудалнуудай нэгэн болоно гэхэдэ алдуу болохогүй.

Борис Балдановай гэрэл зураг.