Эдэ үдэрнүүдтэ Хоца Намсараевай нэрэмжэтэ Буряадай драматическа театрай 85 жэлэй ойн баяр үргэн дэлисэтэйгээр тэмдэглэгдэжэ байна. 1932 оной июлиин 7-до Буряад драмын театр нээгдэhэн түүхэтэй. Буряадай элитэ драматург Намжил Балданогой “Таhалдал» гэһэн зүжэгөөр театр зохёохы замаа эхилжэ, харагшадай анхарал татаhан юм. Алишье үедэ театр арад зоной дунда буряад хэлэеэ, уран зохёолоо, түүхэ, заншалаа нэбтэрүүлжэ, дэлгэрүүлжэ байгаа. 

Мүнөө Буряад драмын театр гүрэн дотороо түрүү театрнуудай нэгэн болонхой. 85-дахи театральна хаһаяа түрэл театрнай амжалтатай үнгэргэбэ. Москва хотоһоо уригдаһан найруулагша Владимир Бочаровай “Наадан” (Достоевскиин «Игрок» гэhэн романай удхаар) зүжэгөөр энэ жэлэй театральна хаhа эхилээ гээд һануулая. Залуу найруулагша Сойжин Жамбалова “Бэлшэрэй түүхэ” гэһэн зүжэг табяа. Тус зүжэг намар үнгэргэгдэхэ “Арт – миграция” гэһэн залуушуулай фестивальда шэлэгдээд байна. 

Эдээнhээ гадна Буряад театр хэдэн шэнэ зүжэгүүдые харуулаа. Залуу режиссёр Виктор Жалсанов “Принцесса на горошине” гэһэн мэдээжэ онтохо найруулжа табиба. Тэрэнь Улаан-Үдын театрнуудай дунда үхибүүдтэ зорюулагдаһан эгээл эрхим найруулга гэжэ тэмдэглэгдээ. Александр Пушкинай “Смотритель”, Айгиз Баймухамедовэй “Аба эжын ургынууд” гэһэн зүжэгүүд мүн лэ табигдаа. 

Ойн баяртай дашарамдуулан, Буряад драмын театр 4 үдэрэй туршада ёһотойл һайндэр эмхидхээ. Түрүүшын үдэр, июлиин 3-да, бэлигтэй залуу драматург Ярослава Пулинович гэгшын зохёолоор Литваhаа ерэhэн режиссёр Тадас Монтримасай найруулhан “Оройтоһон дуранай охин” гэжэ зүжэг харуулагдаа. Июлиин 4-дэ “Аба эжын ургынууд” гэhэн найруулга олоной анхаралда дурадхагдаа. Хүүгэдэй эрхын талаар этигэмжэтэ түлөөлэгшэ Татьяна Вежевич Yбшэн үхибүүдтэ туһалха жасын ажалда Буряад театрые хабаадалсахыень уряалһан байна. Энэ тусхай түсэлэй хэмжээндэ хүнгэн бэшэ хуби заяатай хүүгэд тухай тус зүжэг табигдаа hэн. Июлиин 5-да “Полет. Бильчирская история” гэһэн зүжэг харуулагдаа. Энэл үдэшэ буряад дуунуудай үдэшэ болоо. “Алтан баг” гэһэн харалгын экспертнүүд дээрэ нэрлэгдэhэн гурбан зүжэг хаража, манай театрай ехэ түсэлдэ хабаадаха тухай шиидхэбэри гаргаха байна. Июлиин 6-да Буряад драмын театрай 85 жэлэй ойдо зорюулагдаhан баяр ёhололой үдэшэ, ехэ тоглолто үнгэргэгдөө. Мүнөө жэлдэ түрүүшынхиеэ Щукинай нэрэмжэтэ Москвагай театральна институдта буряад студи нээгдэжэ, 9 оюутад артистын, нэгэн – найруулагшын таhагта һуража байна. Хоёр хүбүүд Санкт- Петербургда театрай уран зураашын мэргэжэлээр hурана. Нэгэ-нэгэ хүн Москвада продюсерай, Красноярск хотодо абяа буулгадаг операторай hуралсал гарана. Тиигэжэ табан жэлэй үнгэрхэдэ, эдэ залуушуул театртаа бусажа, аха үеынхидые халан абаха болоно. Түрэл театраа ойн баяраарнь амаршалаад, үшөө олон, үндэр амжалтануудые хүсэе! 

Цырегма САМПИЛОВА