​"Алтан сэргэдэ" үндэһэтэнэй театрнууд бууба

Хоца Намсараевай нэрэмжэтэ гүрэнэй буряад драмын театрта «Алтан сэргэ» гэжэ үндэһэтэнэй театрнуудай уласхоорондын III фестиваль сентябриин 12-то баярай оршондо эхилбэ. Ород, Хитад, Монгол оронуудһаа, мүн тиихэдэ Башкири, Татарстан, Тыва Уласһаа тон бэлигтэй артистнууд Улаан-Үдэ хүрэжэ ерээ.

Газаа намар байбашье, огторгойн олон бурхад урлигай түрүү мэргэжэлтэдэй буряад нютагта олоороо сугларһандань баясаһанаа мэдүүлэн, айхабтар дулаан үдэшэ тогтобо. Театрай урдахи ехэ талмай дээрэ айлшадаа угтан абаад, театрта урижа оруулба. Ирагуу һайхан буряад хүгжэм доро харагшадай заалай үүдэнүүд нээгдэхэ, Уильям Шекспирай «Ромео Джульеттэ хоёр” гэжэ таһа буряадшалагдаһан зүжэг харыт гэһэн урилга доро дэлхэйн үндэһэтэнэй театрнуудай түрүү зүжэгшэд оробо.

Буряад Уласай соёлой яаманай сайд Тимур Цыбиков иигэжэ хэлэбэ:

- Үндэһэтэнэй театрнууд аргагүй хэрэгтэй гэжэ Ород гүрэнэй Соёлой яаман хүсэд ойлгоһоноо мэдүүлэн, «Алтан сэргэ» фестивалииемнай мүнгөөр дэмжэбэ. Холые холо гэнгүй, Хитад, Монгол оронуудһаа ялас гэмэ зүжэгшэдэй манайда айлшаар бууһанда урматай байна. Татарстан, Башкортостан Уласуудта, мүн тиихэдэ Тыва Уласта ажаһуудаг харагшадаа уран һайханда хүртөөжэ, бурханһаа үгтэһэн бэлиг талаангаараа олониитые баясуулдаг зоной «Алтан сэргэдэмнай» буужа ерэһэндэнь, урматай байнаб.

«Алтан сэргэ» фестиваль сентябриин 16 болотор үдэр бүхэндэ һонин һонин зүжэгүүдтээ харагшадые урина.